2012 წლის 21 თებერვალს ,,ეკოლოგიური სამართლის ცენტრმა’’ საქართველოს სახალხო დამცველს ქალაქის ხელმძღვანელობის მიერ გარემოს დაცვის კუთხით ჩადენილ დანაშაულებებზე რეაგირება მოსთხოვა და ყველა ის დოკუმენტაცია გადასცა, რომელიც ამ საკითხებს ეხებოდა. გუშინვე, საღამოს სახალხო დამცველის ოფისში სპეციალური შეხვედრა გაიმართა. სახალხო დამცველმა გიორგი ტუღუშმა ,,ეკოლოგიური სამართლის ცენტრის’’ იურისტი ნიკოლოზ მჟავანაძე მიიღო და პირადად მისგან მოისმინა ის პრობლემები, რომელთა მოგვარებას ცენტრი ითხოვს.
,, სახალხო დამცველთან საუბრისას აღინიშნა, რომ ბოლო წლებში სამწუხარო ტენდენციად იქცა დედაქალაქში არსებული პარკებისა და სკვერების განადგურება და მათ ადგილზე გამგეობებისა თუ პოლიციის შენობების აგება. რისი დასტურადაც თუნდაც ბოლო ორი შემთხვევა მოსკოვის პროსპექტი და კიკვიძის პარკია. ყოველივე კი წინააღმდეგობაშია შესაბამის ნორმატიულ აქტებთან და ქვეყნის კონსტიტუციასთან. შეხვედრისას სახალხო დამცველმა გიორგი ტუღუშმა შეშფოთება გამოთქვა კიკვიძის ბაღში ხეების გაჩეხვის გამო და დაადასტურა, რომ კიკვიძის პარკთან და ქალაქის სხვა ეკოლოგიურ პრობლემებთან დაკავშირებით იგი თბილისის მერს გიგი უგულავას შეხვდება და მასთან გაარკვევს ამ საკითხებს’’. -განაცხადა შეხვედრის დასრულების შემდეგ ,,ეკოლოგიური სამართლის ცენტრის’’ იურისტმა ნიკოლოზ მჟავანაძემ.
Комментариев нет:
Отправить комментарий